Waqtiga dhacdooyinka: Dhaawaca iyo geeridii Jeneraal Maxamed Faarax Caydiid
Iyadoo wareysi uu qaaday weriye Xasan Barise uu ka kooban yahay khaladaad, dad badan ayaa i weydiiyey inaan ra’yi ka dhiibto. Ma doonayo inaan galo taariikhda dagaalkii sokeeye, waayo dad kale ayaa horay uga hadlay, balse waxaan rabaa inaan saxno waqtiga dhabta ah ee dhaawaca iyo geeridii Jeneraal Maxamed Faarax Caydiid.
Aniga oo ahaa weriyaha BBC-da ee joogay Muqdisho xilligaas, waxaan wareysi la yeeshay Jeneraal Caydiid 4-tii Luulyo 1996. Wareysigan wuxuu ka dhashay dadaal aan ku bixiyey ku dhowaad lix bilood. Waxaa igu caawiyey helitaanka wareysiga mid ka mid ah la-taliyeyaashiisa, Prof. Maxamed Faarax Jimcaale (AUN) — oo ka mid ahaa siyaasiyiintii ugu horreeyey ee kasoo horjeeda dowladdii Maxamed Siyaad Barre (AUN), isla markaana lahaa taariikh dheer oo la xiriirta kooxihii hubeysnaa ee xukunka ka tuuray dowladda militariga.
Wareysigii aan la yeeshay Jeneraal Caydiid wuxuu ahaa mid dheer — ku dhowaad 54 daqiiqo, waxaana ku soo qaadnay mowduucyo badan. BBC-du waxay baahisay wareysigan toddobaadkii ku xigay (11-kii Luulyo, haddii xusuustaydu sax tahay). Wareysigan weli wuxuu ku jiraa keydka BBC; qof kasta oo raba inuu tixraaco wuu ka codsan karaa BBC-da.
24-kii Luulyo 1996, Jeneraal Caydiid waxaa dhaawac culus ka soo gaaray dagaal culus oo ka dhacay dhanka koonfureed ee dhismihii hore ee safaaradda Maraykanka (dhanka Wadajir). Qoyskiisa, asxaabtiisa dhow iyo la-taliyayaashiisu waxay go’aansadeen in dhaawacaas aan loo shaacin dadweynaha.
25-kii Luulyo 1996, raadiyaha Cali Mahdi, oo soo xiganaya ilo amni, ayaa ku dhawaaqay in Jeneraal Caydiid uu dhaawac culus soo gaaray dagaalkii dhacay maalintii ka horreysay. Waa idaacaddii ugu horreysay ee soo tabisa dhaawiciisa.
28-kii Luulyo, idaacaddiisa ayaa baahisay fariin cod duuban oo uu Jeneraal Caydiid ku sheegay inuu “nabad qabo,” isagoo yidhi: “Aniga waxaan dhiman doonaa keliya maalinta i qoran.” Ma aanan wareysan Jeneraal Caydiid xilliga uu dhaawacnaa, sida uu Xasan Barise sheegay. (Fariintan codka ah waxay weli ku jiri kartaa kaydka Radio Muqdisho; waxaan rajeynayaa inay taariikhyahannadu heli doonaan.)
1-dii Agoosto 1996, Jeneraal Caydiid wuxuu u geeriyooday dhaawicii rasaasta (AUN). Subaxdii xigtay, 6:30 a.m., idaacaddiisa ayaa ku dhawaaqday geeridiisa, iyadoo sabab uga dhigtay “wadne-xanuun.” Isla maalintaas ayaa lagu aasay qabuuraha ku dhow Isbitaalka SOS, degmada Huriwaa.
Luuqada English ayuu ku qoray
Xigasho haruun macruuf